Apeli lë në burg drejtuesit e “Bankers Petroleum”, hetimet zbulojnë skemë mashtrimi dhjetra milionëshe

Gjykata e Apelit të Juridiksionit të Përgjithshëm ka vendosur të lërë në fuqi masën “arrest me burg” për ish-drejtorin e kompanisë “Bankers Petroleum”, Leonidha Çobo, si dhe për drejtorin aktual, shtetasin kinez Hongping Xiao. Seanca u zhvillua këtë të martë, ku ishte i pranishëm edhe një përfaqësues i ambasadës kineze në Tiranë.

Të dy të arrestuarit kishin kundërshtuar masën e sigurisë të vendosur nga Gjykata e Fierit, por Apeli rrëzoi ankimimet dhe mbështeti qëndrimin e Prokurorisë, duke i lënë në burg. Megjithatë, për disa nga zyrtarët e tjerë të hetuar, masat u zbutën pjesërisht.

Nga pesë të dyshuar që ndodheshin në “arrest shtëpie”, njëri prej tyre përfitoi ndryshim të masës në “detyrim paraqitjeje”, për arsye familjare, pasi është prind i një fëmije të mitur. Ndërkohë, për tre persona të tjerë u hoq ndalimi për të dalë jashtë shtetit, duke u lënë vetëm detyrimi për t’u paraqitur pranë policisë gjyqësore.

Në total, dhjetë persona – zyrtarë dhe ish-zyrtarë të kompanisë – janë nën hetim për një skemë të dyshuar mashtrimi që, sipas Prokurorisë, ka dëmtuar rëndë buxhetin e shtetit shqiptar. Ata dyshohet se kanë shmangur detyrimet tatimore në vlera që arrijnë miliona euro, duke përdorur skema të sofistikuara dhe mekanizma për pastrim parash.

Ata akuzohen për veprat penale: “Krijimi i skemave mashtruese lidhur me TVSH-në”, “Fshehja e të ardhurave”, “Pastrimi i produkteve të veprës penale”, “Shpërdorimi i detyrës” dhe “Moskryerja e detyrave nga organet tatimore”.

Prokuroria njofton se hetimet vijojnë dhe nuk përjashtohet zgjerimi i tyre ndaj institucioneve të tjera të përfshira.