Në protestën e 128-të kundër qeverisë, aktivisti Arben Kola ka bërë thirrje për ndërhyrje të menjëhershme të SPAK-ut ndaj zyrtarëve dhe personave që, sipas tij, janë të përfshirë në afera korruptive. Gjatë fjalës së tij para protestuesve, Kola deklaroi se institucionet e drejtësisë duhet të veprojnë pa vonesa dhe të nisin arrestimet e personave që ai i konsideron përgjegjës për korrupsionin.
Në listën e emrave të përmendur prej tij ishin ish-zëvendëskryeministrja Belinda Balluku, ish-drejtuesi i Policisë së Shtetit Ilir Proda dhe biznesmeni Roni Yeffet. “Lufta jonë është me hajdutët e pozitës dhe opozitës”, u shpreh Kola, duke iu drejtuar edhe Policisë së Shtetit me një apel për lirimin e protestuesve të arrestuar.
Ai paralajmëroi gjithashtu efektivët e policisë se përgjegjësit për ndalimet mund të përballen me pasoja në të ardhmen. Në përmbyllje të fjalës së tij, Kola përsëriti kërkesën ndaj SPAK-ut për të ndërmarrë veprime konkrete ndaj personave që ai i akuzon për korrupsion. “Ne jemi për një Shqipëri të lirë dhe demokratike. Nuk shitet Shqipëria, në burg qeveria”, deklaroi aktivisti.
