Armando Prenga refuzon pyetjet e prokurorisë, kërkon të njihet me provat e akuzave

Deputeti Armando Prenga, i shoqëruar nga avokati i tij mbrojtës, është paraqitur paraditen e sotme pranë Prokurorisë së Përgjithshme.

Prenga ishte thirrur nga prokurori Altin Binaj, për të dhënë shpjegime për ngjarjen para komisariatit të Laçit, me cilësinë e të pandehurit. Tre akuza, “plagosje e lehtë me dashje”, “kanosje” dhe “armëmbajtje pas leje” i janë komunikuar ish-deputetit socialist, i cili në zyrën e prokurorit, Prenga mësohet se ka kërkuar të njihet me provat e prokurorisë.

Si dëshmitë e peshkatarëve të familjes Cali, akt-ekspertimet e ndryshme, deklarimet e efektivëve të policisë dhe prova të tjera shkresore. Por, edhe pasi u njoh me këto akte, thanë burimet, deputeti nuk ka pranuar të japë shpjegime, e drejt që ia njeh ligji.

Në dalje të prokurorisë, Prenga nuk pranoi të komentonte akuzat, kurse avokati i tij mbrojtës tregoi arsyen e paraqitjes së deputetit pranë organit të akuzës.

Sipas prokurorisë, Prenga kërkoi të njihet edhe me disa prova që janë siguruar vetëm pak ditë më parë, një kopje të të cilave i mori për t’i studiuar. Vetëm pak ditë më parë, Gjykata e Lartë, i ndryshoi masën e sigurisë deputetit Prenga, nga ajo e “arresti me burg” në “arrest shtëpi”. Prokuroria pretendon se deputeti mbrëmjen e 4 shtatorit me një pistoletë pa leje, që ende nuk është gjetur, ka qëlluar në drejtim të peshkatarëve të familjes Cali, ku kanë mbetur të plagosur dy prej tyre.