Dy persona janë vrarë në një atentat në lëvizje sot në Balldren të Lezhës.
Njëri nga viktimat është identifikuar si Kreshnik Mujeci, i cili ndodhej me bashkëshorten në makinë, e cila po ashtu ka mbetur e vdekur.
Automjeti është qëlluar disa herë.
Trupat e viktimave ndodhen ende në automjet, ndërsa nuk dihen ende autorët ose rrethanat e ngjarjes.
Policia është në vendngjarje dhe ka nisur hetimet.
Atentati me dy viktima në Balldre, flet kreu i Policisë Lezhë: Mjeti u godit me breshëri plumbash gjatë lëvizjes
“Në sallën operative të drejtorisë vendore të policisë Lezhë ka mbërritur një informacion për të shtëna me armë në Balldre. Menjëherë shërbimet e policisë kanë mbërritur në vendngjarje. Është konstatuar që mjeti është goditur me breshëri armësh në lëvizje. Mjekët kanë konfirmuar për dy humbje jetësh, një burrë dhe një grua. Lajmi është shumë i rëndë”, u shpreh Arben Nasufi, Drejtor i Drejtorisë së Policisë Vendore Lezhë.
Atentati ndaj Kreshnik Mujecit, paraprakisht dyshohet të ketë lidhje me motive hakmarrjeje. Para 10 vitesh, në tetor të 2016, dyshohet se Kreshnik Mujeci së bashku me vëllanë e tij, Lin Mujeci kanë vrarë një shtetas tjetër, Genc Mhillaj, ngjarje kjo e ndodhur në fshatin Mali i Jushit në Shkodër.
Në pranga kanë rënë më 2017 Lin Mujeci, 38 vjeç dhe vëllai i tij Kreshnik Mujeci, 30 vjeç, asokohe, të cilët ishin shpallur në kërkim.
Vrasja e Genc Mhillaj ndodhi më 6 tetor të 2016 rreth orës 11:00 te ura në fshatin Mali Jushit. Menjëherë pas vrasjes ishte shpallur në kërkim 21- vjeçari, Jozef Mujeci.
Si ndodhi vrasja e Genc Mhillaj në 6 tetor të 2016
Ngjarja e rëndë ka ndodhur rreth ores 11. 00 të së enjtes pranë fshatit Mali i Jushit. Genc Mhillaj (Pjetri) 42 vjec nga Torovica është qëlluar me armë zjarri e për pasojë ka humbur jetën.
Viktima Genc Mhillaj, 42 vjeç ka qenë duke drejtuar automjetin tip kamionçinë me targa AA 609 IV, i cili ka qenë ngarkuar me miell dhe misër. Viktima ka qenë duke ecur në rrugë ndërsa Mujeci e ka ndalur dhe e ka thirrur për të biseduar.
Pranë urës së Malit të Jushit ata janë konfliktuar me njëri-tjetrin dhe në sherr e sipër Mhillaj ka tentuar të largohet me vrap, po autori e ka ndjekur dhe ka qëlluar me pistoletë në drejtim të tij. Për pasojë viktima është rrëzuar në fushë.
42- vjeçari Genc Mhillaj ka ndërruar jetë menjëherë, pasi plumbi e ka goditur në ballë. Nga ana tjetër autori është larguar me shpejtësi në drejtim të Torovicës.
Njoftimi i policisë 2017:
Vihen në pranga 2 persona të shpallur në kërkim të dyshuar si autorë të vrasjes me armë zjarri të shtetasit G.M. ndodhur 1 vit më parë në fshatin Mali i Jushit në Shkodër
Me datë 06.10.2017, strukturat e Sektorit për Krimet e Rënda të Drejtorisë Vendore të Policisë Lezhë në bashkëpunim me FNSH-në Tiranë , pas një pune të mirëorganizuar , bazuar në informacione të marra në rrugë policore ,kanë finalizuar me sukses operacionin e koduar ” One Year “.
Si rezultat i tij , u bë i mundur lokalizimi dhe kapja e 2 personave të shpallur në kërkim , dhe konkretisht e shtetasve :
– Lin Mujeci , 38 vjeç, banues në Torovicë – Lezhë
– Kreshnik Mujeci , 30 vjeç , banues në Torovicë – Lezhë
Këta 2 shtetas ( vëllezër), dyshohen si autor të vrasjes së shtetasit G.M. ngjarje e ndodhur me datë 06.10.2016, në fshatin Mali i Jushit në Shkodër .
Për këta shtetas, Prokuroria e Rrethit Gjyqësor Shkodër ka lëshuar Urdhër Ndalimi për veprat penale ” Vrasje me paramendim ” kryer në bashkëpunim ‘ Prodhim dhe mbajtje pa leje e armëve luftarake dhe municionit ” parashikuar nga nenet 78-25, 278/4 të Kodit Penal.