Athina: Negociatat me Shqipërinë kane përparuar

Zëvendës ministri i jashtëm grek Georgios Katrougalos në një intervistë për mediat ka deklaruar se negociatat me Shqipërinë për marrëveshjen e detit kanë përparuar në mënyrë të konsiderueshme.

“Negociatat me Shqipërinë kanë përparuar në mënyrë të konsiderueshme, por ka ende aspekte që kërkojnë ende punë. Nga pala shqiptare mbetet akoma i paplotë stafi i Gjykatës Kushtetuese, mendimi i së cilës konsiderohet i nevojshëm nga politika e vendit fqinj për të përfunduar procesin e negociatave”.

Diplomati grek u shpreh se zgjerimi i hapësirës detare është e drejtë legjitime dhe e patjetërsueshme sovrane e Greqisë, në përputhje me të drejtën ndërkombëtare.

Duke iu referuar përplasjeve të fundit me Turqinë për shtrirjen e ujërave greke nga 6 deri në 12 milje, zëvendësministri grek u shpreh se vendi i tij ka të drejtë të zgjerojë hapësirën atëherë kur e sheh të arsyeshme.

Sipas tij kjo e drejtë është e pakushtëzuar dhe nuk vihet në dyshim e nuk negociohet me palët e treta.

Vazhdimisht Athina dhe Tirana kane deklaruar se janë pranë marrëveshjes për detin por ende nuk ka një produkt konkret.