Aulona Bylykbashi takim me veteranë, dhe të moshuar: Me ju ecim përpara me dinjitet dhe mirënjohje!

Në vijim të turit të saj elektoral, kandidatja për deputete në listat e hapura të Partisë Socialiste, Aulona Bylykbashi, zhvilloi një takim të veçantë me një grup të çmuar të komunitetit: veteranë, familje dëshmorësh dhe të moshuar që mbajnë gjallë kujtesën historike dhe vlerat më të mira të këtij vendi.

Në këtë takim, znj. Bylykbashi ishte e shoqëruar nga Kryetari i Bashkisë Elbasan, Gledian Llatja, drejtuesi politik i qarkut, Arbjan Mazniku, kandidati në listat e mbyllura Adi Qose, si edhe kryetarja e Partisë Socialiste në Elbasan, Mira Urupi. Takimi u zhvillua në një atmosferë të ngrohtë dhe përplot emocione, ku znj. Bylykbashi shprehu mirënjohjen e saj për kontributin e jashtëzakonshëm të kësaj shtrese të shoqërisë.“Ju jeni themeli i vlerave që na bëjnë krenarë si shoqëri. Ju faleminderit për fjalët e mençura, për besimin dhe dashurinë. Me ju, Partia Socialiste ecën përpara me dinjitet dhe mirënjohje!”, u shpreh Aulona Bylykbashi.

Ky takim shënon një tjetër ndalesë domethënëse në rrugëtimin e saj elektoral, ku fokusi mbetet tek dialogu i hapur dhe dëgjimi i zërit të çdo qytetari që ka dhënë dhe vazhdon të japë për Shqipërinë.