Autorët e vrasjes së 22-vjeçarit në gjykatë, babai i vrasësit: Situata e rëndë

Ka nisur në Gjykatën e Tiranës seanca gjyqësore për katër të akuzuarit për vrasjen e Marvi Mihalit në afërsi të Stadiumit “Selman Stërmasi”.  Prokuroria ka kërkuar masën e sigurisë “Arrest me Burg” për të akuzuarit. Vetëm Eugen Bitraj ka pranuar autorësinë e vrasjes.

Në ambientet e jashtme të seancës ka qenë i pranishëm edhe babai i Eugen Bitrajt. “I kërkojmë falje familjes. i shprehim ngushëllime të thella. U lutem të gjejnë forca të reagojnë pozitivisht. Gjithçka ka ndodhur për një karikues. Nuk jemi takuar deri tani pasi situata është shumë e rëndë”.

Gjykata e Tiranës pritet të japë sot masën e arrestit për katër të arrestuarit për vrasjen e 22-vjeçarit Marvi Mihali dy ditë më parë në zonën pranë stadiumit “Selman Stërmasi”.

Të rinjtë Dejvi Bitraj, Kridens Alla, Marsel Alla, Eugen Bitraj si dhe Marvi Mihali u konfliktuan për karikuesin e një celulari. Viktima i kishte blerë Dejvi Bitrajt, kushëririt të autorit telefonin celular, por më pas ka konstatuar se nuk punonin disa aplikacione dhe ushqyesi.

Ky ka qenë edhe motivi i konfliktit i cili ka përfunduar në përdorimin e thikës ku për pasojë mori plagë në zemër 22-vjeçari Marvi Mihali, i cili humbi jetën rrugës për në spital.