Balla në Vorë: Ekonomia është trefishuar, 5 mijë vende pune nga investimi në Zvërnec

Drejtuesi politik i Partisë Socialiste për qarkun e Tiranës, Taulant Balla, së bashku me kryetarin e bashkisë Vorë, Blerim Shera, zhvilluan një takim me gra dhe vajza në këtë qytet, ku u diskutua mbi zhvillimin ekonomik të vendit dhe perspektivën e integrimit europian të Shqipërisë.

Gjatë bashkëbisedimit, Balla u ndal veçanërisht te një projekt i madh investimi në Zvërnec, të cilin e cilësoi si një nga iniciativat më të rëndësishme të planifikuara ndonjëherë në vend. Sipas tij, ky projekt, pas përfundimit të tij, pritet të gjenerojë rreth 5 mijë vende të reja pune, duke ndikuar ndjeshëm në uljen e papunësisë dhe zhvillimin ekonomik të zonës.

Ai theksoi se ky investim nuk duhet parë vetëm si një ndërhyrje infrastrukturore apo ekonomike, por si një mundësi e madhe zhvillimi për vendin në tërësi. Balla shtoi se kundërshtimi i projekteve të tilla, sipas tij, do të thotë të jesh kundër progresit dhe mundësive të reja për qytetarët. Ai gjithashtu vlerësoi qëndrimin e Kryeministrit Edi Rama, duke u shprehur se qeveria është e vendosur ta çojë deri në fund këtë projekt strategjik.

Në fjalën e tij, Balla u ndal edhe te performanca e ekonomisë shqiptare, duke deklaruar se ajo është rritur ndjeshëm në vitet e fundit. Sipas tij, vlera e ekonomisë kombëtare ka kaluar nga rreth 9.5 miliardë euro në rreth 27 miliardë euro, një tregues që ai e lidh me reformat e ndërmarra dhe përmirësimin e klimës së biznesit në vend.

Ai shtoi se këto zhvillime kanë ndikuar drejtpërdrejt në forcimin e stabilitetit ekonomik dhe në krijimin e më shumë mundësive për qytetarët shqiptarë, duke e paraqitur këtë periudhë si një fazë rritjeje dhe transformimi ekonomik për vendin.