Balla nga Njësia 7: Diaspora po shtron themelin e një fitoreje historike për PS-në

Drejtuesi Politik i PS-së për Diasporën, Taulant Balla mori pjesë në një takim me banorë të komunitetit me origjinë nga vendlindja e tij, Librazhd që jetojnë në Njësinë Administrative nr. 7 në Tiranë, në mbështetje të kandidates për deputete, Etilda Gjonaj.

Balla vlerësoi angazhimin e diasporës në zgjedhjet e ardhshme, duke theksuar se mbi 50 mijë do të votojnë vetëm për Tiranën dhe ripërsëriti thirrjen për DHL që të respektojë kontratën me KQZ. Në fjalën e tij, Balla theksoi nevojën për një mazhorancë të konsoliduar që të mundësojë përfundimin e reformave të mëdha dhe integrimin e vendit në Bashkimin Europian.

”Diaspora është duke shtruar themelin e një fitoreje historike të Partisë Socialiste, si për Tiranën ashtu edhe për Shqipërinë. Më shumë se 50 mijë motra e vëllezër, burra e gra në diasporë do të votojnë për Tiranën dhe afro çerek milion në gjithë Shqipërinë.

“Unë dua t’i falënderoj të gjithë ata vëllezër e motra në diasporë që tashmë e kanë marrë zarfin, e kanë plotësuar dhe e kanë nisur drejt Shqipërisë. Një pjesë ende nuk e kanë marrë dhe dje ia kam tërhequr veshin, po ia tërheq prapë sot DHL-së, që duhet t’i qëndrojë strikte kontratës që ka me Komisionin Qendror të Zgjedhjeve, t’i dërgojë në çdo shtëpi zarfin me fletën e votimit.

Po ashtu, ta marrë në mënyrë që ta kapim afatin e 11 majit, ora 19:00, kur duhet të ketë mbërritur në Shqipëri, në Tiranë, në Komisionin Qendror të Zgjedhjeve çdo votë”.