Basha del në bazën e PD-së, synon mobilizimin e simpatizantëve të tij për datën 8 janar

Më në fund Lulzim Basha ka vendosur të zbresë në bazën e PD-së, pas Referendumit të datës 18 dhjetor kur 43 mijë anëtarë të PD-së votuan për shkarkimin e tij si kryetar në selinë blu. Ndonëse Berisha dhe mbështetësit e tij insistojnë që Lulzim Basha duhet të ikë deri me 5 janar nga zyrat e PD-së, prapë se prapë Basha nuk heq dorë se ai mbetet kryetar i PD-së.

Çështja ka shkuar në gjykatë dhe duket se kryeministri Rama e krejt shpura pas tij po mundohen ti japin vendim gjykate proBashës, çka do ta çojë përplasjen në zyrat e PD-së, si epokale.

Berisha ka lajmëruar për datën 8 janar një protestë të madhe kombëtare kundër kryeministrit në sheshin para kryeministrisë, por edhe për marrjen përfundimtare të zyrave të PD-së, duke larguar me forcë Lulzim Bashën dhe Gazmend Bardhin.

Ndërkohë Basha, që deri më tani nuk ka shkuar të takojë bazën e PD-së nëpër rrethe, është kujtuar tre ditë para Vitit të Ri të turret drejt simpatizantëve të selisë blu.

Mësohet se sot Basha do të jetë në takim në Dibër, ku e pret ish-kryetari i bashkisë së Kamzës dhe sot deputet i PD-së, Xhelal Mziu.

Synimi i Bashës mbetet që të mobilizojë edhe ai turmat që të vijnë me datë 8 janar te oborri i selisë së PD-së për tu përleshur me demokratët që do të vijnë atë ditë me ish-kryeministrin Berisha dhe Komitetin për Riorganizimin e PD-së të Kuvendit të datës 11 dhjetor.

Me sa duket me 8 janar do jetë ditë përplasje finale dhe ku policia e shtetit do të ketë shumë kur të rrihen anëtarët e “familjes” demokrate!