Bashkëshortja e 70-vjeçarit që u plagos nga efektivi i FNSH: Është makina e tretë që na hyn në oborr

Bashkëshortja e 70-vjeçarit që u plagos nga efektivi i FNSH, ka rrëfyer të gjithë ngjarjen që ndodhi orët e para të mëngjesit të sotëm në Fier. Sipas saj kjo është makina e tretë që u hyn në oborrin e shtëpisë pasi rruga është burim aksidenti. Ndërkohë ajo ka shtuar se polici dhe bashkëshorti i saj janë konfliktuar dhe më pas është shkrepur arma duke e kapur në dorë 70-vjeçarin.

“Mirë është tani. Këtu bëhen gjithmonë aksidente. Është makina e tretë që na hyn brenda. Si burrat janë konfliktuar. Që të dy janë zënë edhe kaq. Armën e shkrepi s’di me qëllim pa qëllim. Policia tha ishte i dehur.

Në orën 1 e gjysëm ishim duke fjetur, por dëgjova zhurmë dhe dola në ballkon. Pash që ishte aksidentuar makina dhe ishte futur në oborrin tonë. Zbritëm poshtë. Ishte vetëm një person. Kur burri pa makinën që ishte dëmtuar i tha; shiko ça më ke bërë. Ai (Polici) nisi që të shante. ‘Unë e djeg, unë të bëj..’. Filloi pastaj të shante burrin. Burri u acarua dhe u kacafytën, pastaj u rrëzuan dhe përleshën. Në kohë kur u përleshën, pash që polici nxori armën dhe e mbante në dorë. Burri më shtyti matanë që të më mbronte. Më pas arma u shkrep, dhe burri u plagos në dorë. Pastaj erdhi policia, se unë e kisha lajmëruar sapo pash që një makinë ishte në oborrin tonë”, tha e moshuara.