Berisha: Ergys Agasi po kërcënon prokurorët! Vrasja në aeroport ishte e organizuar prej tij

Sali Berisha ka lëshuar akuza të rënda ndaj qeverisë Rama. Ai thotë se Ergys Agasi po kërcënon prokurorët dhe se vrasja në aeroport ishte e organizuar prej tij. I pyetur nga gazetarët për qëndrimin e PD-së lidhur me pjesëmarrjen në Komisionet e Posaçme parlamentare, Berisha tha se sot çdo veprim politik është i paralizuar për shkak të asaj që ai e cilësoi si “grusht shteti” në mbrojtje të zëvendëskryeministres Belinda Balluku dhe kryeministrit Rama.

”Sot çdo qytetar shqiptar ka vetëm një rend dite: Lubi Balluku dhe pas saj Edi Rama para gjyqit. Ka një çështje në rendin e ditës të çdo shqiptari dhe kjo është grushti i shtetit kundër shtetit, i kryer nga Edi Rama për të mbrojtur veten e tij nga vjedhjet e tmerrshme.

A e dini ju se Agasi është organizatori i kërcënimit të prokurorëve? Aeroporti është sheshi i pushtetit, është sheshi më i mbrojtur i vendit. Aty mund të ekzekutojë vetëm policia. Askush tjetër nuk çmendet të marrë guximin të kryejë atë vrasje. Ajo ishte vrasje e organizuar nga Ergys Agasi. Mekanizmi i kërcënimit me jetë është mekanizmi që përdor Edi Rama nëpërmjet Ergys Agasit”,-tha Berisha për gazetarët jashtë sallës së Kuvendit.