Berisha mbledh Kryesinë: Në PD ka garë për kryetarin e partisë

Sali Berisha mblodhi këtë të martë Kryesinë e partisë në selinë e PD, ku u ka dhënë direktivat për vijimin më tej me anëtarësime të reja. Sa i përket zgjedhjes për kreun e PD, Berisha ngulmoi se garë ka dhe është demokratike, ndërkohë që pak ditë më parë u përjashtuan nga gara Ervin Salianji, Evi Kokalari, Alesia Balliu, Mereme Sela dhe Vladimir Mulaj.

”Këtë periudhë që na ka mbetur është e domosdoshme që kryengritja paqësore e datës 8 të jetë më e fuqishmja. Jemi në muajin elektoral, zgjedhjet në tërësi kanë ecur, ka pasur probleme në ndonjë vend të cilat po zgjidhen në mënyrë demokratike. Por duhet të ngremë një grup për përgatitjen e Kuvendit Kombëtar të PD. Grupet e punës tani duhet të finalizojnë punët e tyre. Duhet të vazhdojmë me përpjekje për anëtarësime të reja, hapje të PD, modernizimin e PD. Këto do jenë drejtimet më themelore tona”, tha Berisha.

”Kurrë në jetën time nuk kam tentuar dhe nuk do të tentoj kurrë të krijoj kandidaturë. Atë te Sali Berisha mos e prisni kurrë dhe jua them prapë këtu. Në mënyrë absolute, gjerë sot, nuk i kam thënë njeriut të kandidojë. Asnjëherë. Nuk i kam thënë kurrë Lulzim Bashës të kandidojë. S’i kam thënë kurrë Sokol Olldashit të kandidojë, të ndjerit Olldashit të kandidojë. S’i kam kërkuar kurrë Uran Butkës të kandidojë me mua. Jo. S’i kam kërkuar kurrë Ibsen Elezit të kandidojë”.