Berisha: Në Sarandë shteti dhe krimi janë një, portugezin e vr*u mjedisi i të fortëve i krijuar nga narkoshteti

Kreu i PD-së, Sali Berisha, ka reaguar ashpër pas vrasjes së turistit portugez në Ksamil, duke e cilësuar ngjarjen si një dëshmi të lidhjeve mes krimit dhe strukturave që operojnë në industrinë turistike. Në një konferencë për mediat, Berisha deklaroi se ngjarja është në kufijtë e asaj që ai e cilësoi si “krim shtetëror”, duke argumentuar se industria turistike në Sarandë dhe zonat përreth është nën ndikimin e krimit. ”Industria turistike në Sarandë është në kthetrat e krimit. Në Sarandë, shteti dhe krimi janë një. Ligji nuk ekziston”, u shpreh Berisha.

Deklarata e plotë

Vrasja e 20-vjeçarit portugez, turist në Ksamil, është një akt sipas të dhënave, pothuaj vrasje shtetërore. E them këtë në kuptimin, jo se ai u ekzekutua nga njerëz me uniformë, por në kuptimin e vërtetë se industria turistike në Sarandë është në kthetrat e krimit.

Në Sarandë, shteti dhe krimi janë një. Ligji nuk ekziston. Në Sarandë, dhe jo vetëm, flitet gjerësisht për një ekonomi të bazuar në trafiqe droge, njerëzore etj, e cila gëlon nga darka në mëngjes në lokalet e natës, të cilat funksionojnë gjer në agim. Në plazhet e pushtuara, ku nuk gjendet një metër plazh publik, por të gjitha të dominuara nga të fortit që shesin shezlonget qindra euro.

Por vrasja e turistit portugez ka edhe një karakter konkret shtetëror, sepse në këtë akt makabër, e quaj makabër, erdhi të bëjë pushimet tek ne ai, dhe tani ai përcillet në arkivol, në këtë akt makabër. Bashkëpunëtorë ishin të paktën 3 punonjës me uniformë. Kjo dëshmon se cila është shkalla e lartë e inkriminimit të rojeve të sigurisë në këto lokale.

Ata në vend se të parandalonin krimin, e fshehën për orë të tëra krimin, në mos, hetimi do tregojë, ndoshta edhe morën pjesë në masakrimin e 20-vjeçarit portugez. Një turist mund të humbasë jetën në një vend, mund të ndodhë dhe të marrë goditje fatale, por turistit portugez i ndodhën këto në një mjedis ku rojet e sigurisë ishin punonjës shtetërorë dhe kjo dëshmon se cila është shkalla e lartë e inkriminimit.

Dhe njëherë, ata punonjës kishin detyrë ta parandalonin, nuk mund të them se futën apo jo thika në trupin e turistit, por ata bënë një krim të shëmtuar sepse e fshehën krimin. E fshehën krimin e shëmtuar! Dhe shëmtia vazhdon më tej kur krerët e narkoshtetit rrahin gjoksin për sukses se u kap vrasësi pas shumë e shumë orësh në vend se duhet të skuqeshin me turp për aktin që ndodhi në duart e shtetit. Portugezin, pra, e vrau mjedisi kriminal i krijuar nga narkoshteti në Sarandë, Ksamil dhe më gjerë. E vrau mjedisi i dominuar nga të fortët e shtetit. Thika ishte vetëm mjeti, instrumenti i këtij mjedisi.

Sot, ambasada të vendeve partnere kryesorë njoftojnë qytetarët e tyre, apo u tregojnë listën e lokaleve në të cilat nuk duhet të shkojnë. Që të gjitha këto kanë licenca. Por ato vazhdojnë punën pa asnjë lloj shqetësimi sepse janë të miqve të qeverisë. Saranda njohu dy ngjarje, kjo është më tragjikja, por më parë u shkelmua oficeri i policisë, dy javë më parë u vra tjetri në derë të shtëpisë aty, de facto rendi është në duart e krimit. Dënoj me forcën më të madhe dhe njëherë shpreh ngushëllime familjes. Çdo shqiptar duhet t’i shprehë ngushëllime kësaj familje. I biri i saj erdhi në Shqipëri për pushim, kthehet në arkivol nga banda shtetërore.