Baristi i njohur shqiptar, Dritan Alsela ka reaguar ndaj një postimi të kreut të PD-së, Sali Berisha. Ky i fundit kishte shpërndarë një video të Alselës, duke e shoqëruar me një koment kritik, ndërsa baristi e ka konsideruar përdorimin e materialit si të padrejtë dhe pa lejen e tij. “Ky person ka 4 milionë ndjekës dhe jeton në Düsseldorf. Kësaj i thonë ‘kur bëhesh gaz i dheut’”, ka qenë ky postimi i Berishës për baristin, çka solli përplasjen virtuale. Në reagimin e tij, Alsela akuzon Berishën se mban përgjegjësi për emigrimin e shumë shqiptarëve në vitet ’90, përfshirë edhe vetë atë, duke e lidhur këtë me situatën politike dhe ekonomike të asaj kohe.
Reagimi i plotë i Alselës
Ky person në këtë video ka një emër dhe një mbiemër: Dritan Alsela, të cilin ju, zoti Berisha, jeni i detyruar të paktën ta përmendni. Përdorimi i kësaj videoje pa informimin dhe pa pëlqimin tim është një shkelje e qartë e të drejtës së autorit, një koncept që ju, i formuar me mentalitetin “unë jam mbi gjithçka”, as nuk e njihni dhe as nuk e pranoni. Unë kam mundësinë që këtë video ta fshij brenda pak minutash, por nuk ia vlen të merrem me dikë që koha vetë e ka vendosur aty ku është sot. Unë jam Dritan Alsela. Kur ju erdhët në pushtet, unë nuk i kisha mbushur ende 18 vjeç, dhe ajo që ju i bëtë Shqipërisë – ekonomikisht, shoqërisht dhe mbi të gjitha një brezi të tërë të rinjsh si unë është ndër dëmet më të mëdha që i janë bërë këtij vendi.
Unë e kam përjetuar vetë, jo nga larg, por nga brenda: ishte politika juaj, ishte drejtimi juaj, ishte stili juaj. Ju morët në dorë një lëvizje që nuk ishte e juaja, një lëvizje që mbante shpresën e një Shqipërie europiane, dhe e shkatërruat. Ju i detyruat njerëz si unë të mos e shohin më të ardhmen në vendin e tyre dhe të largohen. Ajo që erdhi më pas, dhe ajo që vazhdon edhe sot, është pasojë direkte e asaj kohe. Për mua nuk ka pasur kurrë ndryshim thelbësor mes partive në Shqipëri; emra të ndryshëm, por të njëjtat rrënjë: njëra anë përfaqësonte të vjetrën komuniste, tjetra strukturat e fshehta që e mbajtën atë gjallë.
Këto struktura të errëta nuk janë zhdukur kurrë, ato vazhdojnë të jetojnë edhe sot. Demokraci e vërtetë nuk ka pasur kurrë. Dhe ajo që ndodh sot nuk është rastësi. Ajo që bën Edi Rama sot është thjesht vazhdimi i asaj që ju keni nisur. Ai po e çon deri në fund një sistem që e mban Shqipërinë peng, një vend që nuk i shërben vetes, por strukturave të vjetra të pushtetit. Ky është realiteti, dhe ky është edhe rezultati i asaj që ju keni ndërtuar.