Berisha thirrje në Kuvend: Votoni sonte rezolutën e dënimit të gjenocidit serb në Kosovë

Sali Berisha nga seanca e sotme plenare ka kërkuar në Kuvend që të votohet rezoluta e dënimit të gjenocidit serb në Kosovë. Nesër do të mbahet takimi ndërparlamentar mes Kosovës dhe Shqipërisë. Po ashtu shtoi se rezoluta e dënimit të gjenocidit serb duhet të votohet sot, në mënyrë që nesër deputetët shqiptarë të shkojnë në parlamentin e Kosovës si përfaqësues të Shqipërisë.

Pjesë nga fjala e Berishës

Meqënëse edhe në mëngjes e ngrita para mediave, tani thashë ta shtroj edhe në parlament. Të ndërprisni menjëherë punimet, të sillni këtu rezolutën për denoncimin e gjenocidit serb në Kosovë, se përndryshe ulja juaj në parlamentin e Kosovës është më e largët si përfaqësues të Shqipërisë dhe më e afërt si përfaqësues të Serbisë.

Ju keni refuzuar rezolutën. Votoni sonte rezolutën e dënimit të gjenocidit serb në Kosovë, në mënyrë që të shkoni nesër si përfaqësues të shqiptarëve, dhe jo si ata që nuk njihni krimet e shëmtuara. Unë po ju them ju këtu që në librat e gjenocidit ato janë të përshkruara si krimet më të padëgjuara ndonjëherë në histori, dhe ju e hidhni poshtë këtë.

Të votoni një ndjesë publike për ndalimin që i bëtë himnit për Adem Jasharin “Mora fjalë”, dhe u fsheh pastaj se zëvendësuan me një këngë shumë të bukur, nuk e mohoj, “Rrjedh në këngë e ligjërime”, për Shqipërinë, por nuk zëvendësohej se, ajo e zuri vendin. Shkurte Fejzën e ftuan, ishte në stadium dhe tani u erdhi telefoni i kuq nga Beogradi dhe e hiqni ju atë. Si do shkoni ju atje? Hidhe në votë propozimin tim. Moj zonjë, hidhe në votë propozimin tim, kaq.