Besnik Muçi: Shkarkimi i Dacit i bën të pavlefshme vendimet e KPA-së

Në nëntor 2019 prokurori Besnik Muçi, shkarkohet nga detyra si i tillë, në një kohë që ai ishte dekretuar nga Presidenti Ilir Meta si anëtar i Gjykatës Kushtetuese. Këtë detyrë ai e kreu vetëm për pak javë. Kolegji i Posaçëm i Apelimit ndërkohë kishte filluar procesin e Vetting-ut dhe për një mos deklarim të pasurisë, që sipas tiji referohej ende periudhës së regjimit komunist, shkarkohet nga detyra si prokuror.

Anëtari i Kolegjit të Posaçëm të Apelimit, pra organi që i vinte vulën vetingut të prokurorëve, Luan Daci, sot është pezulluar nga detyra nga SPAK. Arsyeja e pezullimit te sotëm por edhe te nisjes se një hetimi ndaj gjyqtarit Daci është fshehja prej tij në formular e largimit të tij nga detyra në vitin ‘97 për pa aftësi.

“Është një njoftim tronditës, jo vetëm për mua dhe kolegët që i janë nënshtruar procesit të Vetting-ut por për të gjithë qytetarët shqiptar, për ëndrrën europiane të Shqipërisë. Sot Vetting-u pësoi sot një goditje vdekjeprurëse, sepse një nga anëtarët kryesorë rezultoi se është zgjedhur në kundërshtim të Kushtetutës”, thotë ish-prokurori i intervistuar nga A2. Muçi dëshiron të përshëndesë vendimin e sotëm të SPAK, që cilëson si “një akt të guximshëm”.

Sipas mendimit të tij, shkarkimi i Dacit e bën “të gjithë vendimmarrjen e KPA-së të pavlefshme, sepse praktikisht trupat gjyqësore nuk janë caktuar me ligj, diçka që shkon kundra konventës të së drejtës së Njeriut, dhe nenit 42 të Kushtetutës”.