Bie niveli i Fierzës nën 275 metra, thatësira dhe temperaturat e larta përkeqësojnë situatën

Niveli i ujit në liqenin e Fierzës ka vijuar të ulet gjatë javës së fundit, duke reflektuar mungesën e reshjeve dhe prurjet e pakta nga lumenjtë që e furnizojnë atë. Kuota maksimale e liqenit arrin rreth 296 metra, ndërsa gjatë korrikut dhe gushtit reshjet në verilindje të vendit kanë qenë minimale.

Në Kukës, prurjet e Drinit të Bardhë, i cili buron në malet e Pejës, dhe Drinit të Zi, që vjen nga zona e Shën Naumit, janë aktualisht mesatarisht më pak se 70 metra kub ujë në sekondë.

Kjo sasi është dukshëm më e ulët krahasuar me kapacitetin e shkarkimit të hidrocentralit të Fierzës. Vetëm një nga katër turbinat mund të përpunojë të paktën 112 metra kub ujë në sekondë, ndërsa në rast se të katërja vihen në punë njëkohësisht, kapaciteti i shkarkimit arrin në rreth 450 metra kub në sekondë.

Diferenca mes prurjeve aktuale dhe kapacitetit të hidrocentralit tregon presionin e shtuar mbi rezervën hidrike. Mungesa e reshjeve të mjaftueshme, e kombinuar me temperaturat e larta dhe nevojën për prodhim energjie, po ndikon drejtpërdrejt në nivelin e liqenit.

Situata e Fierzës mbetet një tregues i rëndësishëm për gjendjen hidrike në veri të Shqipërisë, ndërsa zhvillimet e mëtejshme do të varen në masë të madhe nga reshjet dhe prurjet e lumenjve gjatë periudhës në vijim.