Bie niveli i ujërave në tokat e përmbytura në qarkun e Shkodrës

Situata në territorin e qarkut Shkodër paraqitet e qëndrueshme dhe në përmirësim gradual.

Sipas përditësimit të fundit të Prefekturës Shkodër, në zonën e Dajçit është vërejtur rënie e nivelit të ujit, ndërsa te “Urrelat e Shirqit” nuk ka më prani uji. Aksi rrugor i Obotit vijon të ketë prezencë uji rreth 20–30 cm, por me tendencë të vazhdueshme rënieje.

Prefektura e qarkut Shkodër bën të ditur se transporti i banorëve në zonat e prekura vijon të realizohet nga Regjimenti i Këmbësorisë së Veriut, me një mjet me kalueshmëri të lartë dhe pesë efektivë të Forcave të Armatosura.

Në territorin e bashkive Vau Dejës, Malësi e Madhe, Pukë dhe Fushë Arrëz, situata paraqitet e qëndrueshme dhe nën kontroll, pa raportime për problematika apo emergjenca.

Sipas të dhënave të Drejtorisë së Ujitjes dhe Kullimit Lezhë, nivelet e ujit në pikat monitoruese vijojnë të jenë nën kuotat kritike. Niveli i lumit Drin në Bahçallëk ndodhet në kuotën 7.2 metra, ndërsa lumi Buna regjistrohet në kuotën 8.30 metra në Pazar dhe 6.40 metra në Dajç. Hidrovoret e Velipojës vijojnë të funksionojnë normalisht në kuotën –1.90 metra dhe punojnë në kapacitet të plotë, duke garantuar menaxhimin e prurjeve.

Nga Drejtoria Rajonale e Vendosjes Shkodër raportohet se nuk ka probleme me qarkullimin rrugor. Megjithatë, në akset malore rekomandohet qarkullimi me goma dimërore dhe/ose zinxhirë.

Prefektura Shkodër njofton se kontraktorët e mirëmbajtjes rrugore konfirmojnë se qarkullimi në akset Qafë Mali–Fierzë dhe K/Hadroj–Q/Bënë kryhet vetëm me goma dimërore ose zinxhirë.

Akset Dedaj–Razëm, Bogë–Qafë Thore–Theth dhe Hani i Hotit–Vermosh janë të kalueshme, por kërkohet respektim rigoroz i rregullave të qarkullimit, sinjalistikës dhe përdorimi i pajisjeve dimërore.

Institucioni i Prefektit të Qarkut Shkodër, në bashkëpunim me strukturat përgjegjëse, vijon të jetë në terren dhe të monitorojë në mënyrë të pandërprerë situatën.