Biseda e fundit me gjyqtaren e vrarë

“E respektonte e gjithë lagjja. I dija problemet e saj dhe gjithnjë e mbështesja. E takova para pak ditësh.

E pyeta edhe për ish-burrin.

Më tha ‘Jam e frikësuar’”.

Kështu deklaroi dje, një prej fqinjave të gjyqtares, raporton “GSH”.

Duke mos dashur të identifikohej me emër, ajo rrëfeu se shkonte shumë mirë me Fildesin, ku kujtoi edhe bisedën e fundit që kishte bërë me të.

“Jetoj këtu pranë, jam në një lagje me të.

Para pak ditësh e takova.

Po flisnim për pushimet dhe për përgatitjet që ajo do të bënte për të çuar fëmijët në shkollë.

M’u duk e shqetësuar. E pyeta se çfarë kishte, por nuk donte të më tregonte.

E pyeta për ish-burrin, për atë që sot i mori jetën dhe la fëmijët rrugëve. Më tha se ishte e frikësuar.

Të dielën i kishte zënë rrugën dhe ishin zënë. I kishte kërkuar që të ktheheshin bashkë, por Fildesi nuk pranonte.

Ishte e përkushtuar vetëm te fëmijët e saj. I thashë të kishte kujdes nga ai njeri.

Sot (dje) u trondita kur mora vesh për ngjarjen. Ai burrë nuk e meritonte të kishte një grua si ajo”, – tha fqinja e gjyqtares, së cilës i dridhej zëri gjatë gjithë bisedës së bërë me të.