Bllokime nga dëbora në Lezhë, Qafa e Ulzës dhe rruga drejt Kishës së Laçit të pakalueshme
Aktualitet Kronikë E Diel, 12 Janar 2025 17:19
Policia Rrugore e Lezhës ka njoftuar për bllokimin e disa segmenteve rrugore për shkak të reshjeve të dendura të dëborës.
Segmenti rrugor nga Skuraj në drejtim të Ulzës është i bllokuar në Qafë të Ulzës, duke penguar qarkullimin e mjeteve në këtë zonë.
Një tjetër rrugë e bllokuar është ajo që të dërgon te Kisha e Laçit, ku reshjet e borës kanë krijuar vështirësi të mëdha për kalimin e mjeteve.
Policia apelon drejtuesit e automjeteve të shmangin këto segmente deri në përmirësimin e situatës dhe të marrin masa për udhëtime të sigurta, duke përdorur goma dimërore ose zinxhirë.
Nga Lezha njoftohet se Moti i ftohtë, i shoqëruar me reshje dëbore dhe erë të fortë, ka krijuar vështirësi në qarkullimin e mjeteve, si brenda qytetit ashtu edhe në superstradën që përshkon Lezhën.
Për shkak të situatës, Njësia e Qarkullimit Rrugor pranë Drejtorisë Vendore të Lezhës ka nisur monitorimin e akseve kryesore, duke vendosur patrulla në pika fikse si në segmentin Lezhë-Shkodër, ashtu edhe në segmentin Lezhë-Milot.
Policia Rrugore po kontrollon gjendjen teknike të gomave dhe kushtet që duhet të plotësojnë mjetet për të lëvizur në rrugë. Gjithashtu, është apeluar që drejtuesit e mjeteve të tregojnë kujdes të shtuar gjatë lëvizjes dhe, në rast problematikash, të kontaktojnë për ndihmë dhe asistencë në numrin 129.
