Bujar Osmani: Ligji i Gjuhëve në prag të vendimit, Gjykata pret reagimin e shqiptarëve

Ish-ministri i Punëve të Jashtme i Maqedonisë së Veriut, Bujar Osmani, tha se sipas informacioneve që ai disponon, Gjykata Kushtetuese e ka gati vendimin për çështjen e Ligjit për Përdorimin e Gjuhëve, por po vonon publikimin e tij.

“Ata vendimin e kanë gati, mirëpo janë duke pritur. Kanë dilemat e tyre se si do të jetë reagimi i shqiptarëve. Në disa momente e kanë anuluar shpalljen e vendimit dhe po matin pulsin e njerëzve, po shohin opinionin publik. Megjithatë, ata i frikësohen reagimit të popullit shqiptar, jo vetëm në vend, por edhe në rajon“, deklaroi Osmani.

Ai theksoi se është me rëndësi që të dërgohet një mesazh i qartë për mbrojtjen e Marrëveshjes së Ohrit, duke e cilësuar atë si interes të të gjithë qytetarëve të Maqedonisë së Veriut.

“Ruajtja e Marrëveshjes së Ohrit nuk është vetëm interes i shqiptarëve, por i çdo qytetari të Maqedonisë së Veriut, për të ruajtur këtë model unitar, të ndërtuar me shumë mund, i cili është dëshmuar si modeli i vetëm i suksesshëm në Ballkan për zgjidhjen e çështjeve në shtetet multietnike”, tha ai në ”A2cnn”.