Bushati: Qeveria e PD-së do të rris pensionet, ilaçe më cilësore me rimbursim për të moshuarit

Drejtuesi politik i PD-së në Shkodër, Helidon Bushati ka zhvilluar një takim me pensionistët në lagjen “Perash”, ku ka bashkëbiseduar rreth shqetësimeve. Pjesë e takimit ishin edhe prindërit e tij, ku si të gjithë pensionistët përballen me të njëjtat probleme.

Pensionet e vogla dhe harresa që ka bërë qeveria e 8 viteve për qytetin e Shkodrës dhe shkodranët, ishin shqetesimet kryesore ndërsa shumë prej tyre thanë se jetojnë me të ardhurat e femijëve pasi pensioni nuk ju del as për bukë jo për të mbyllur faturat e muajit apo për të blerë ilaçe.

Nga ana tjetër, Bushati shpalosi programin e Partisë Demokratike dhe përfitimet që do të ketë kjo grupmoshë pas zgjedhjeve të 25 prillit. Ai u angazhua se qeveria e ardhshme do të rrisë pensionet sa dyfishi i normës së inflacionit dhe në çdo rast jo me pak se 5% në vit. Po kështu pensionistët do të jenë përfitues të skemës së rimbursimit të ilaçeve, uljes së çmimit të energjisë elektrike.