Çelet panairi i edukimit, trajnimit dhe punësimit në Dibër! Zv/kryeministrja Balluku: Mundësi për të rinjtë

Dibra ka çelur panairin e Edukimit, Trajnimit dhe Punësimit për të njohur të rinjtë e kësaj zone em mundësitë e reja për të hyrë në tregun e punës. Të rinjtë kanë mundësi të mësojnë për fusha të ndryshme dhe mundësitë që ofrohen. Panairit i janë bashkuar aktorë të sektorit publik dhe privat.

Zv/kryeministrja njëherësh ministre e Infrastrukturës dhe Energjisë, Belinda Balluku, e shoqëruar edhe nga ministrja për të rinjtë vizituan këtë panair ku biseduan me të rinjtë.
Balluku bëri të ditur se tashmë të rinjve u ofrohen më shumë mundësi në sektorin e shërbimeve, duke qenë se Shqipëria po njeh një rritje të numrit të turistëve.

“Kemi pritur në 2023 mbi 10 milionë turistë dhe këtë vit presim që numri i të huajve që vizitojnë vendin tonë të arrijë 13 milionë. Tashmë sfidë mbetet akomodimi dhe rritja e cilësisë së shërbimit”, u shpreh ajo teksa takoi një ndër sipërmarrësit në fushën e agroturizmit. Balluku shtoi gjithashtu se udhërrëfuesit janë gjithnjë e më të kërkuar në treg. “Të rinjtë e zonës e kanë me pason promovimin e vendit të tyre dhe ne ndaj duhet ti mbështesim, pasi është një profesion i ri”, u shpreh Balluku.

Ministrja për Rininë, Bora Muzhaqi theksoi se program kombëtar i praktikave të punës nuk zbatohet vetëm në Tiranë por në të gjithë Shqipërinë dhe ka si fokus që të rinjve tu jepet akses në administratën shtetërore.