Cenimi i marrëveshjes së 5 qershorit, Gogo: Precedent i rrezikshëm

Këshilli Politik ka kohë deri më 30 korrik për të përfunduar Reformën më të rëndësishme pas asaj në Drejtësi e që është ajo Zgjedhore. Produkti dhe procedurat që u kryen në këtë proces, sipas shoqatave dhe shoqërisë civile, përbën një rrezik për demokracinë dhe të ardhmen.

Në studion e “Ditari”, Premto Gogo, kryetar i KRIIK ALBANIA (Koalicioni per Reforma Integrim dhe Institucione të Pavarura), theksoi se “Marrëveshja e 5 qershorit ka benefit futjen në shinë institucionale të proceseve politike në vijimësi, por precedent i rrezikshëm është cenimi i dakordësisë politike pa marrë jetë akoma”.

”Sistemi demokratik ku ne po bëjmë përpjekje për t’u integruar ka për bazë dialogun dhe pjesë e dialogut janë marrëveshjet politike, që janë baza për arritjen e çdo reforme. Kur zhbëhet kjo dakordësi, nuk ka më garanci për zbatimin e marrëveshjeve të ardhshme”.

Sipas tij, zgjidhja e këtij ngërçi vjen nga kompromisi: “Ajo që propozojmë është që kjo marrëveshje të kalojë urgjentisht në Kuvend dhe Kuvendi të rinisë një proces të mirëfilltë konsultimi dhe gjithëpërfshirjeje”.