Çështja e detit/ Ministri i Jashtëm i Greqisë, Dendias: Një kapitull i ri me Shqipërinë

Ministri i Jashtëm grek, Nikos Dendias, duke folur për çështjen e kufijve detarë, tha se Greqia dhe Shqipëria po hapin një kapitull të ri në marrëdhënien e tyre dypalëshe. Dendias e cilësoi një hap të madh për të dyja vendet dërgimin e çështjes së detit në Gjykatën Ndërkombëtare në Hagë.

“Ky është një vendim shembullor se si çështjet e rëndësishme mund të zgjidhen kur të dy palët fokusohen në respektimin e ligjit ndërkombëtar dhe marrëdhënies së fqinjësisë së mirë…Unë jam veçanërisht i kënaqur që kohët e fundit kryeministrat Mitsotakis dhe Rama kanë rënë dakord për të shpejtuar konsultimet në fushën ligjore në nivelin e ekspertëve”.

Për pjesën e vendimit të Këshillit të BE-së për të shtyrë datën e çeljes së negociatave, ministri i Jashtëm përsëriti qëndrimin se Greqia mbështet pespektivën Europiane të Shqipërisë.