Çuçi: Në magazina ka stok 3 mujor për të përballuar çdo situatë

Ministri i Bujqësisë, Bledi Çuçi bën me dije se janë marrë masat që të mos ketë asnjë ndërprerje të furnizimit me mallrat e shportës dhe jo vetëm të supermarketeve dhe dyqaneve në këtë kohë pandemie. Në një intervistë për ”Ora News”, ministri Çuçi tha se u është kërkuar dhe tregtarëve të krijojnë një stok 3 mujor si dhe është garantuar mekanizmi që edhe qeveria të marrë përgjegjësinë për mos shitjen e tyre.

”Kemi marrë masat që ditën e parë për këtë problem. Nuk ka pasur problem të tilla. Dyqanet kanë qenë plot dhe nuk ka munguar asnjë produkt jo vetëm i shportës por dhe produkteve të tjera. Nga ana tjetër ne që në fillim kemi marrë masa duke i detyruar të gjithë tregtarët e shumicës, të magazinave të krijojnë një stok 3 mujor në magazinat e tyre për të përballuar çdo situatë të mundshme që mund të vijë nga bllokimi i eksporteve nga të gjithë vendet ku ne marrim produkte ushqimore, dhe duke garantuar mekanizma dhe duke marrë përgjegjësinë së bashku dhe qeveria për mos shitjen e tyre. Besoj se dhe tek kjo pikë qeveria ka punuar dhe ka reaguar në kohë dhe sic duket nga rezultatet ka vepruar në mënyrë të dobishme dhe në favor të qytetarëve”.