“Dashuri” në kohërat e lejlasë: Në burg “Mona Liza” që i zhvati 60 mln lekë drejtorit

Historia e saj ka pushtuar mediat, pasi me biznesin e saj ajo shfrytëzonte ndjenjat e më të dobëtve. Historia e Enertila Beqja, 27-vjeçarja nga Manza e Durrësit, që bëri për vete 30-vjeçarin drejtor poste në Manzë, pa u takuar asnjë ditë vetëm përmes mesazhe në facebook, ka tronditur opinion publik. Ajo i zhvati 60 milionë lekë që nga viti 2015, e historia e saj ka qenë kryefjala e aktualitetit ditëve të fundit.

27-vjeçarja kishte një profil me foto që nuk ishin të sajat, por të një aktoreje të njohur telenovelash meksikane. Beqja mohoi në gjykatë çdo akuzë për zhvatjen e 60 milion lekëve me anë të mashtrimit, gjykata e Durrësit, i dha masën e sigurisë “arrest me burg”.

Sipas Barush Ahmetaj, 27-vjeçarja përmes mashtrimit dhe premtimit për martesë, i zhvati miliona lekë. Ahmetaj u shpreh se ato para ishin fituar me mundin e vëllezërve të tij në emigracion. Në sallën e gjyqit, vajza që nuk ka asnjë lidhje me fotot e profilit të përdorur për mashtrim, deklaroi se është e pafajshme dhe se profili nuk i përket asaj. Dy të rinjtë u ballafaquan nga policia, ndërsa 30-vjeçari nuk e njohu vajzën. “Zërin e kanë të njëjtë, por nuk është vajza që flisja unë, sepse ajo më ka thënë se është bionde”, mësohet të ketë thënë ai para hetuesve të çështjes.

30-vjeçari

“Ajo më thoshte që ishte bionde e bukur dhe foto e saj e profilit ishte shumë e bukur. Pasi folëm disa herë, unë u dashurova pas saj. E kisha seriozisht, ishte vajza me të cilën do të martohesha. Më tha që jetonte dhe ishte emigrante në Itali dhe se familja e saj kishte disa vështirësi ekonomike. Që në fillim më kërkoi lekë. Ia kam nisur me “Westernwnion” 1 mijë euro në emrin e saj. Më pas i kam dërguar 10 mijë euro. Një herë tjetër më tha se ishte sëmurë dhe unë u nisa për në Itali. Kur shkova në Itali, më tha që të kthehesha sepse kishte ardhur në Shqipëri. Në Itali kam shkuar dy herë, i kam blerë dhe të brendshme me tyl. Të gjitha paratë ia kam dhënë asaj që nga viti 2015 kur u njohëm. E doja nuse në shtëpi, por ajo më ka mashtruar. Kemi folur në facebook me mesazhe. Nga fotoja ishte shumë e bukur dhe joshëse. Atë nuk e kam takuar asnjë herë. Më la kur më mbaruan lekët”,-u shpreh para policisë 30-vjeçari.

Prindërit

Prindërit e vajzës kanë reaguar duke kërkuar drejtësi për të bijën, që sipas tyre ishte e lidhur me një djalë nga Durrësi që jeton në Itali. “Policia më erdhi befasishëm. Kërkoj drejtësi! Plaçkat e shtëpisë i kam bërë me ndihmën e dhëndrit, Alban Mustafa që është nga Durrësi dhe jeton në Itali”, thotë Myrteza Beqja, babai i Enertilës. “Goca ime s’ka lidhje me Barush Ahmetajn. Ai është postier. Nga ai marr KEMP-in. Divanet e mi nuk i ka sjellë Barush Ahmetaj. Ai të shkojë t’i gjejë lekët. Albanin e kam parë në fotografi”, thotë e ëma e vajzës.