Debate e tensione në Kuvend. Berisha: Sot parlamenti mbyllet me faqe të zezë

Ka nisur me debate e tensione seanca e sotme në Kuvend, e cila është edhe e fundit për këtë sesion parlamentar.

Ndërkohë që kryetarja e Kuvendit hodhi në votim ndryshimin e rendit të ditës, deputetët e opozitës kundërshtuan duke përplasur duart mbi tavolinë.

Shkak është bërë projektligji për kanabisin mjekësor. Opozita ka kundërshtuar diskutimet, ndërsa kërkon interpelancë me Ramën për inceneratorët.

Ndërkohë, ish-kryeministri Sali Berisha ka shpalosur një banderolë në Kuvend ku shkruhet “mafia e plehrave”. Berisha u afrua pranë foltores së Kuvendit, i shoqëruar edhe nga deputët e grupit të tij, teksa mbanin në duar banderola të Ramës me foto kanabisi.

Në fjalën e tij, Berisha ka akuzuar maxhorancën se po ngrihen kundër Kushtetutës.

Ai tha se mosfutja në rend të ditës të mocionit me debat me Ramën, është akt u turpshëm.

“Akt i turpshëm që bëni ju, shkelmim i ligjeve. Kryetarja e parlamentit e cila duhet të jetë mbrojtëse, zbatuese kryesore e kushtetutës, rregullores së parlamentit e shkelmon me të dyja këmbët, për interesa të Gjinushit, Tom Doshit. Ai zotëria që nxin me mungesën e tij duhet të vijë sot në parlament. Sot mbyllet parlamenti me faqe të zezë për shkak të tij. Ka një mocion për interpelancë për arratisjen e numrit dy të qeverisë. Ju ngriheni kundër kushtetutës, doni të rrezoni këtë të drejtë me vota këtu”, tha Berisha.

Ndërsa kreu i grupit parlamentar të PD-së, Gazment Bardhi tha: “Ju doni të kaloni në heshtje vjen me inceneratorët. Nuk mund të kalojë kjo aferë pa dhënë llogari Edi Rama.
E kuptoj sikletin tuaj që nuk doni të flisni për këtë çështje, por nuk doni që të kaloni për diskutim aferën e ineneratorëve. Ndaj nuk doni ta fusni këtë kërkesë tonën për mocion me debat.”