Dëborë në korrik dhe zjarre në bregdet: Turqia përjeton ekstremet e motit

Reshje të dendura dëbore godasin verilindjen e vendit për herë të parë pas dekadash, ndërsa 1.600 kilometra më tej, në bregdetin perëndimor, flakët vazhdojnë të kërcënojnë zonat turistike.

Një kontrast i fortë klimatik ka përfshirë sot Turqinë, ku reshje të dendura dëbore kanë mbuluar rajonet malore të verilindjes, ndërsa në anën tjetër të vendit, në perëndim, vijojnë zjarret e fuqishme që kanë përfshirë zonat bregdetare dhe turistike.

Sipas mediave turke, reshjet e dëborës, një dukuri jashtëzakonisht e rrallë për muajin korrik, janë regjistruar në provincat e Rizes, Trabzonit, Bajburtit dhe Erzurumit – pjesë e Anadollisë Lindore. Temperaturat kanë rënë ndjeshëm në zonat malore, duke e kthyer shiun në dëborë në një shtrirje prej mbi 100 kilometrash.

“Jam 65 vjeç dhe kam kaluar gjithë jetën në Rize. Është hera e parë që shoh dëborë në korrik,” ka deklaruar Gjenxha Karafazlioglu për agjencinë franceze të lajmeve AFP. “Ka rënë dëborë për afro pesë orë. Disa të moshuar përmendin raste të ngjashme rreth 30–40 vite më parë, por kjo situatë është e paprecedentë.”

Pamjet e transmetuara nga agjencia turke DHA tregojnë një shtëpi tradicionale prej guri në Rize të mbuluar me më shumë se 10 centimetra dëborë.

Ndërkohë, në skajin tjetër të vendit, në bregdetin perëndimor, zjarrfikësit po përballen me vatra të fuqishme zjarri që kanë përfshirë rajonin e Izmirit dhe zonat përreth. Flakët janë nxitur nga temperaturat e larta, thatësira e zgjatur dhe erërat që arrijnë deri në 85 kilometra në orë.

Autoritetet paralajmërojnë për përkeqësim të situatës gjatë fundjavës, me temperatura që pritet të arrijnë deri në 40°C në brigjet perëndimore dhe në juglindje të vendit. Edhe në kryeqytetin Ankara, parashikimet tregojnë temperatura mbi 36°C në ditët në vijim.

Kjo situatë ekstreme ka shtuar shqetësimet mbi ndikimin e ndryshimeve klimatike në rajon, ndërsa autoritetet janë vënë në alarm për të përballuar pasojat që vijnë nga ky mot i paqëndrueshëm dhe i paprecedentë për mesverën.