Dekriminalizimi, Krasniqi: Janë larguar rreth 500 persona

Sipas drejtorit të ISP-së dhe analistit Afrim Krasniqi, të dhënat edhe pse pjesore, tregojnë për një numër gjithmonë e më të madh të personave të larguar në bazë të ligjit të Dekriminalizimit. ”Sipas të dhënave tona, të marra nga Departamenti i Administratës Publike, 190 nëpunës civil janë larguar për shkak të dekriminalizimit” por thotë se shifrat zyrtare nuk tregojnë, nga momenti që nuk përfshihen ato figura që nuk kanë statusin e nëpunësit civil, ”aty ku shifra tejkalon 500 persona”.

Krasniqi tregon se mungesa e vullnetit politik në këtë çështje tregohet edhe nga një e dhënë domethënëse. ”Në 2015 partitë bënë sakrifica, PD tërhoqi disa kandidatë në Kurbin dhe Këlcyrë, të njëjtën gjë e bëri PS nga lista kryesore. Atëherë ishte me i vështirë identifikimi i këtyre personave. Kjo gjë nuk ndodh sërish në 2019”.

Për këtë arsye, sipas tij, përtej dënimit individual, penalizimin e vërtetë duhet ta marrin partitë politike. ”Nëse unë shkoj kandidat në një zonë dhe partia ka dalë garant për mua, duke thënë se jam kandidati më i mirë, subjekti që ka dalë garant për mua duhet të ketë të paktën penalizim financiar dhe administrativ”.