Dënimi i liderëve të UÇK-së në Hagë, Tabaku: Dy parlamentet shqiptare të bashkëpunojnë

Deputetja e Partisë Demokratike, Jorida Tabaku, e ka cilësuar si një ditë të trishtueshme për shqiptarët vendimin e Gjykatës Speciale në Hagë për dënimin e katër ish-krerëve të Ushtrisë Çlirimtare të Kosovës, me një total prej 81 vitesh burgim.

E ftuar në emisionin “Top Story”, Tabaku foli për vendimin, rolin e Shqipërisë dhe Kosovës pas këtij zhvillimi, si dhe për nevojën, sipas saj, për një qasje të përbashkët institucionale ndaj çështjes.

“E shohim si një ditë të trishte për kombin, sepse ata tre komandantë shkuan në luftë duke mos e ditur nëse do të kthehen gjallë. Edhe gjykatën e ndërtuan duke mos e ditur këtë dënim. Edhe vetë krijimi i gjykatës, është një akt burri shteti. Nga ana tjetër duhet parë roli i Shqipërisë, nëse ka mbështetje.

Nuk e dimë nëse vendi ynë ka akorduar ndonjë fond për këtë gjyq, Kosova ka dhënë 40 milionë euro. A duhej të shpallnim ne me gojën plot se ka pasur gjenocid në ato zona? Nuk e bëmë. Nuk është patriotizëm të vizitosh ata në Hagë. Nuk kemi parë asnjë akt të vetëm përveç fjalimit të Ramës në asamblenë parlamentare të KE. Opozita ka pasur gjithnjë iniciativën të shpallë gjenocidin.

Serbia jeton me idenë dhe punon gjithnjë kundër shqiptarëve. Dhomat i kërkuan me detyrim dhe prandaj u kompleksuan për të folur. Në 4 vite parlamenti ynë duhej t’i kishte marrë ato masakra një nga një dhe t’i shpallte akte gjenocidi. I vetmi akt që mbaj mend ka qenë Rama në asamblenë parlamentare të KE dhe disa u armiqësuan me atë që tha Rama. Ishte shumë retorik.

Shqipëria është e kotë të krenohet për NATO-n pa qenë Kosova, do të jetë njësoj edhe për BE-në. Është e nevojshme që në këtë moment të dy parlamentet të bashkohen për qëllime të përbashkëta, me iniciativën e dy qeverive, duke hequr egon e kryeministrave. Me strategji në apel, deri në shkallën finale të gjykatave”, u shpreh Tabaku.