Deputeti shqiptar në Beograd, Kamberi: Nuk e garanton dot Serbia stabilitetin e Ballkanit

Shqiptari i vetëm në parlamentin serb, deputeti Shuaip Kamberi thotë se nuk është Serbia ajo që garanton stabilitetin e rajonit. Për të është prezenca e NATO-s gjithandej që nuk do ta lejojë një Serbi të Vuçiç apo të dikujt tjetër, që të destabilizojë Ballkanin.

”Serbia e cila pavarësisht se është nostalgjike ndaj Rusisë, pavarësisht interesave strategjike me Rusinë, e ka të vështirë të marrë anën e lindjes, ndërkohë që investimet e saj, në masën më të madhe, varen nga investimet e BE.

Nëse Serbia do të merrte një përkrahje të drejtpërdrejtë ndaj Rusisë, mund të jetë një bazament që Moska mund ta përdorte për të destabilizuar Ballkanin. Megjithatë, situata nuk është kaq e thjeshtë, pavarësisht nostalgjive historike që kanë me Rusinë. Serbia është shumë e varur nga Perëndimi.

Ajo është e rrethuar nga NATO dhe nuk është Serbia ajo që garanton stabilitetin rajonal, është prezenca e NATO gjithandej që nuk do ta lejojë një Serbi të Vuçiç apo të dikujt tjetër që të destabilizojë Ballkanin”.