Dëshmia – Naftëtari tenton të vetëhidhet nga oxhaku 40 m i lartë, s’mori pagën

Ka zbritur pas tre orësh negociatash me policinë e Fierit dhe familjarët, naftëtari 60 vjecar Agim Myrdini që kërcënoi se do të vetëhidhej nga 40 metra lartësi.

Lutja e djalit dhe e familjarëve por dhe premtimi i përfaqësuesit të firmës se do i kalohen pagat e prapambetura bindën punëtorin e rafinerisë së naftës në Fier të zbresë.

Agim Myrdini, baba i gjashtë fëmijëve, duket se kishte parë si zgjidhje të vetme këtë formë pas heshtjes dhe mosreagimit.

Vendimin final për të zbritur nga oxhaku i furrave 60 vjecari e mori vetëm pas premtimit nga përfaqësuesi i pronarëve për likujdim të pagave të prapambetura.

“Nuk kam besim tek këta. Nëse nuk do më zgjidhin problemin unë do tentoj sërish të hidhem. Kam punuar dhe 16 orë e 14 orë, sepse kisha fëmijët. E bëra për të gjithë kolektivin”

Pas zbritjes nga oxhaku, 60-vjeçari u transportua me ambulancë në spitalin e Fierit për kontroll mjekësor.

Punëtorët e uzinës së përpunimit të naftës thonë se kanë 4 muaj pa marrë paga dhe 22 muaj pa iu depozituar sigurimet shoqërore.

Në reagimin e saj Shoqëria Trading Petrol and Drilling sha, një prej kontraktoreve të ARMO shpjegon se në bazë të marrëveshjes së firmosur, pergjegjesite dhe detyrimet ndaj punonjësve qëndrojnë me kompaninë ARMO.

/Oranews