Dëshmitari që “fundosi” Aldo Baren: Jemi në rrezik, na kanë hequr mbrojtjen

Arben Kicja, një nga dëshmitarët kyç në çështjen kundër kreut të bandës së Lushnjës, Aldo Bare, thotë se jeta e tij dhe familjes së vet, është në rrezik.

Ai thotë se është hequr nga “programi i mbrojtjes”.

Duke folur për medianm, Kicaj ka thënë se autoritetet i kanë thënë se ka shkelur marrëveshjen, por ai pretendon se kjo gjë nuk ka ndodhur.

“Në vitin 2006, unë kam lidhur një marrëveshje me shtetin dhe Prokurorinë e Krimeve të Rënda që të dëshmoja në procesin ndaj Aldo Bares. Fillimisht, gjithçka po ecte krejt normalisht. Por me ardhjen e drejtorit të ri, nisën problemet tona, çka na detyruan të vinim në Shqipëri. Jemi sorollatur nga një derë në tjetrën dhe përfundimisht më datë 7 gusht, u informuam se jemi përjashtuar nga “Programi i mbrojtjes”, me argumentin se kemi shkelur marrëveshjen. Ndërkohë që një gjë e tillë nuk është e vërtetë. Në kurrizin tonë janë bërë padrejtësi. Ne kemi zbatuar çdo pikë të marrëveshjes, por shteti jo”, shprehet Kicja.