Meta: Trimërimi i banditëve vjen se shteti është kap nga kryehorri

Presidenti i Partisë së Lirisë, Ilir Meta ka dënuar sulmin ndaj avokatit Sokol Mëngjesi duke e quajtur një akt kriminal. Meta tha se banditët trimërohen pasi shteti është kapur nga një kryehorr, referuar kryeministrit Edi Rama. “Një akt kriminal, akt i qëllimshëm. Nuk ka asnjë justifikim, dihet nga vjen trimërimi i këtyre horrave dhe banditave. Nga fakti që shteti është kapur nga një kryehorr”, tha Meta.

Gjendja shëndetësore e avokatit Sokol Mëngjesi, i cili u dhunua për shkak të detyrës, vijon të jetë e njëjtë. Ai ndodhet ende në intubim në spitalin e Traumës, por mjekët janë optimistë pasi edema (ënjtje) që ka në një zonë të trurit nuk është zmadhuar. Të paktën për momentin nuk vlerësohet ndonjë ndërhyrje kirurgjikale.

Nga ana tjetër policia ka vijuar kontrollet edhe gjatë ditës së djeshme dhe gjatë natës, por ende nuk ka gjurmë të 3 të shpallurve në kërkim. Kontrollet kanë vijuar pa u ndërprerë por pa rezultat. Sipas sistemit TIMS ata rezultojnë brenda vendit. Grupi hetimor nuk përjashton mundësinë që të jenë larguar jashtë vendit në mënyrë ilegale.