Dibër, Gjunkshi: Ndërtesa me kanabis. Veliu: Shifra të ulëta

Ministria e Brendshme, së bashku me Policinë e Shtetit ka ndërmarrë një nismë të re. Këtë herë, forumi Qytetar për Sigurinë u ndal në Dibër, aty ku deputeti i PD-së, Xhemal Gjunkshi u shpreh se në këtë qark ka ende ndërtesa të mbushura me lëndë narkotike.

“Ky komunitet ka nevojë të ndjehet dora e policisë së shtetit jo vetëm përmes takimeve por edhe nëpërmjet investimeve konkrete. Ka ndërtesa të mbushura me lëndë narkotike. Përkrah iniciativën tuaj, për ta luftuar këtë. Kjo është një e shkuar që ka lënë shumë pasoja”, tha Gjunkshi.

Drejtori i Përgjithshëm i Policisë së Shtetit, Ardi Veliu, nga ana tjetër u përgjigj se Dibra ka qenë ndër qarqet me shifrat më të ulëta, përsa i përket kanabisit.

“Qëllimi i takimit është që ne në policinë e shtetit të identifikojmë ca është bërë mirë dhe çfarë jo. Nuk mund të pretendojmë se drejtoria vendore Dibër është policia më e mirë në botë, po nuk mund ta mohoj që Dibra në dy vitet e fundit nuk ka pasur asnjë ngjarje të rëndë, dhe kjo është meritë e komunitetit tuaj në radhë të parë. Dua të them me plot gojën që policia e Dibrës ka pasur shifrat më të ulëta të kanabisit në vitin 2017 dhe kjo është meritë e juaja dhe e policisë së Dibrës. Jemi sot këtu për të marrë besimin tuaj dhe për të na mbështetur në punën që kemi nisur”, tha Veliu.