Dorëzimi i librave “falas” – Ministria e Arsimit, urdhër shkollave të nisin me vlerësimin e teksteve

Nxënësit e shkollave fillore nga klasa e I  në të IV, të cilët përfituan libra “falas” në fillim të këtij viti shkollor, do i duhet të  përgatiten për dorëzimin e tyre . Ministria e Arsimit urdhëron institucionet arsimore vendore , përgjegjëse për arsimin parauniversitar, që  të nisin me procedurat  për vlerësimin  dhe administrimin  e teksteve shkollore të cilat u dhanë  në përdorim falas në shtator  të vitit 2018.

Sipas Ministrisë  së Arsimit, nxënësit duhet t’i dorëzojnë tekstet menjëherë  pas  përfundimit të vitit mësimor,  ndërkohë që më pas  komisioni i administrimit të teksteve shkollore do të nisi  vlerësimin e gjendjes fizike të teksteve  duke identifikuar nevojat për tekstet të reja. Ndërkohë që nxënësit  do të pajisin për vitin e ardhshëm  me tekste të përdorura me të njëjtin përpjesëtim me ato që kanë dorëzuar  në  fund të vitit ndërsa  pjesa tjetër do të  plotësohet me të reja. Ministria e Arsimit,  në nisje të vitit  shkollor 2018-2019,  shpërndau   për 190 mijë nxënës të arsimit fillor tekste  të cilat janë vetëm për përdorim falas, pavarësisht propagandës  së  përdoruar në nisje të viti shkollor ,  ndërkohë që nxënësi është i detyruar ti dorëzojë sërish në shkollë .

Nëse libri është dëmtuar, nxënësit do te paguajnë vlerën e tij sipas çmimit të katalogut.  Fatura financiare e qeverise për të mbuluar me tekste të ashtuquajtura falas për  arsimin fillor kapi vlerën prej   270 milion lekësh.