Drejtori Hita hap garën për tre departamentet kyçe të Policisë së Shtetit

Drejtori i Policisë së Shtetit, Skënder Hita ka hapur garën për drejtuesit e tre departamenteve kyçe: Policinë Kriminale, Marrëdhëniet Ndërkombëtare dhe Kufirin e Migracionin. Ndryshimet pritet të prekin edhe drejtuesit e disa qarqeve, në kuadër të riorganizimit të strukturave policore. Mes emrave më të përfolur janë Ervin Hodaj për Policinë Kriminale dhe Idajet Faskaj për Marrëdhëniet Ndërkombëtare.

Një nga lëvizjet më të rëndësishme pritet të jetë në krye të Policisë Kriminale, e cila konsiderohet departamenti i dytë më i rëndësishëm në hierarkinë e policisë. Pas përfundimit të mandatit të Neritan Nallbatit, i cili e ka drejtuar këtë strukturë që nga 1 gushti 2022, po qarkullon si emër i mundshëm për zëvendësim Ervin Hodaj, aktualisht drejtues i komanduar i Policisë së Durrësit.

Ndryshime pritet të ketë edhe në Departamentin e Marrëdhënieve Ndërkombëtare, i drejtuar që nga viti 2020 nga Pëllumb Seferi. Gjatë kësaj periudhe, ky departament është vlerësuar për rezultate në ekstradime, përfshirë edhe një numër të lartë ekstradimesh nga Dubai. Për këtë post, ndër emrat që përmenden si kandidatë është Idajet Faskaj.

Riorganizimi prek edhe Departamentin e Kufirit dhe Migracionit, që aktualisht drejtohet nga Saimir Muça, i emëruar rreth një vit më parë. Edhe në këtë strukturë pritet të zhvillohet garë dhe të ketë ndryshime në drejtim.

Pas përfundimit të këtyre konkurseve, pritet që ristrukturimi të vijojë edhe në disa drejtoritë vendore të policisë, përfshirë Beratin, Elbasanin, Korçën, Gjirokastrën dhe Durrësin, ku disa drejtues ende mbeten në detyrë ose janë në pozicion të përkohshëm.