Drejtori i Përgjithshëm i Doganave, Besmir Beja: Unifikim praktikash dhe trajtim i barabartë për bizneset

Drejtori i Përgjithshëm i Doganave, Besmir Beja, njoftoi se miratoi sot udhëzimin e ri për vlerësimin doganor të mallrave, një dokument që synon unifikimin e praktikave, rritjen e transparencës dhe garantimin e trajtimit të barabartë për të gjithë operatorët ekonomikë.

Beja tha se ky udhëzim shërben si dokument praktik pune për strukturat doganore që merren me kontrollin dokumentar, analizën e riskut dhe vlerësimin doganor, duke standardizuar procedurat dhe metodologjinë e përdorur në përcaktimin e vlerës së mallrave.

Një nga risitë kryesore të këtij akti vijoinai, është forcimi i përdorimit të vlerës së transaksionit dhe të të dhënave për mallrat identike ose të ngjashme, në përputhje me legjislacionin kombëtar dhe standardet e Organizatës Botërore të Doganave, duke reduktuar përdorimin e çmimeve të referencës dhe duke rritur transparencën e procesit.

Për herë të parë, udhëzimi përcakton në mënyrë të detajuar hapat e ndjekjes së secilës metodë të vlerësimit doganor, si dhe kalimin nga një metodë në tjetrën, duke siguruar zbatim të njëtrajtshëm të legjislacionit në të gjitha strukturat doganore.

Sipas Bejës, ky udhëzim synon garantimin e mbledhjes së saktë të të ardhurave, trajtim të barabartë për bizneset, parandalimin e nënvlerësimeve dhe mbivlerësimeve, si dhe harmonizimin e praktikave me standardet e Bashkimit Evropian.

“Miratimi i këtij dokumenti shenon një hap te rëndësishëm në modernizimin e administratës doganore dhe krijimin e një mjedisi më të parashikueshëm për biznesin” deklaroi Beja.