Drejtori i Policisë së Burgjeve: Të gjitha burgjet ishin të mbipopulluara!

Drejtori i Policisë së Burgjeve Paulin Rajta, ka folur ditën e sotme për amnistinë penale nga Burgu i Reçit.

Në një prononcim për mediat, Rajta theksoi se një nga arsyet e amnistisë ishte edhe fakti që burgjet ishin të mbipopulluara.

Sipas tij, amnistia është përpjekje e shtetit për të riintegruar në shoqëri ata njerëz që dalin nga qelitë.

“Sapo ka nisur zbatimi i amnistisë. Në këtë burg përfitojnë rreth 140 persona, që do të lirohen sot. Amnistia është përpjekje e shtetit për të rehabilituar ata njerëz, për t’i riintegruar në shoqëri, personat që dalin nga qelitë. Merret parasysh edhe sjellja e shumë të burgosurve, që bëhen pjesë e amnistisë. Pjesë e amnistisë janë vetëm ata persona që nuk përbëjnë rrezik për sigurinë e qytetarëve.

Amnistia zgjidh edhe probleme të mbipopullimit të burgjeve. Kjo bën që burgu të jetë më funksional, të burgosurit që mbeten të mund të kenë më tepër hapësirë. Edhe policia e burgjeve lirohet disi, pasi është punë e vështirë dhe me ngarkesë kur ka mbipopullim. Të gjitha burgjet ishin të mbipopulluara dhe një nga shkaqet e amnistisë ishte mbipopullimi”, u shpreh Rajta.