Liverpooli ka nisur lëvizjet në merkato në kërkim të një sulmuesi dhe një nga emrat kryesorë në listën e “Reds” është Dusan Vlahoviç. Klubi anglez po kërkon përforcime pas dëmtimit të rëndë të Isak, i cili do të qëndrojë jashtë fushave për të paktën dy muaj, pas frakturës së fibulës të pësuar në ndeshjen e fundit të Premier League kundër Tottenhamit.
Sipas raportimeve të TuttoJuve.com, Liverpooli është gati të paraqesë një ofertë prej rreth 20 milionë eurosh për sulmuesin serb në merkaton e janarit. Një shifër që mund ta bindë Juventusin të heqë dorë nga kartoni i Vlahoviçit, duke shmangur rrezikun e largimit të tij pa pagesë në verë, pasi kontrata e futbollistit skadon më 30 qershor.
Ideja e klubit anglez është të mbyllë marrëveshjen që në janar, duke përfituar nga situata kontraktuale e lojtarit dhe duke e siguruar për një çmim më të ulët se vlera reale e tij në treg. Për këtë arsye, kontaktet e para me drejtuesit bardhezi tashmë kanë nisur dhe oferta zyrtare mund të mbërrijë në ditët në vijim.
