Erjon Vishkulli është 28-vjeçari që mbeti i plagosur në sy gjatë protestës së sotme në Tiranë, pasi dyshohet se u godit nga një plumb gome.
Pamjet e publikuara nga protesta treguan të riun me fytyrën e mbuluar nga gjaku, pas plagosjes gjatë përplasjeve mes protestuesve dhe forcave të policisë. Ai u transportua me urgjencë drejt spitalit, ku mori ndihmë të specializuar mjekësore.
Sipas informacioneve paraprake, Vishkulli dyshohet se u godit nga një plumb gome i përdorur gjatë ndërhyrjes së policisë për shpërndarjen e protestuesve. Megjithatë, ende nuk ka një konfirmim zyrtar për mjetin që shkaktoi plagosjen dhe rrethanat e sakta të ngjarjes.
Kush është 28-vjeçari i “Tifozave Kuq e Zi”?
Erjon Vishkulli është një emër i njohur për tifozët e futbollit shqiptar. Ai është pjesë e përfaqësisë së grupimit “Tifozat Kuq e Zi” dhe prej vitesh ndjek Kombëtaren shqiptare, duke qenë një nga figurat aktive të tribunave kuqezi.
Përtej pasionit për futbollin, familja e tij zotëron një biznes të prodhimit të vajit të ullirit në zonën e Elbasanit.
Këtë herë, 28-vjeçari ndodhej në rrugët e kryeqytetit si protestues, por përfundoi i plagosur gjatë përplasjeve. Plagosja e tij ka sjellë reagime edhe nga persona që e njohin, të cilët i kanë shprehur mbështetjen dhe i kanë uruar shërim të shpejtë.
Gazetari Marin Mema ka reaguar në rrjetet sociale pas plagosjes së Erjon Vishkullit gjatë protestës së zhvilluar në Tiranë.
Përmes një postimi në Instagram, Mema i ka kushtuar disa fjalë të riut, duke shprehur mbështetjen dhe lutjet për të, ndërsa ka vënë në pah dashurinë e tij për kombin.
“Erjon, miku im, ata që të njohin nga afër ta dijnë zemrën dhe dashurinë për kombin! Lutem për ty!”, ka shkruar Marin Mema.