”Duam qeveri tranzitore”, Meti dhe Bakalli: Pa 16 deputetë të PS-së, Rama nuk rrëzohet

Aktivistët Bledar Meti dhe Nador Bakalli kanë analizuar reagimet brenda Partisë Socialiste lidhur me protestat masive antiqeveritare. Për ta këto protesta po reflektojnë një pakënaqësi të gjerë në opinionin publik dhe po krijojnë tensione të dukshme brenda vetë strukturave politike të mazhorancës. Meti u shpreh se kryeministri Edi Rama është i vetëdijshëm për situatën politike dhe për faktin se mbështetja ndaj qeverisë është në rënie, duke e përshkruar këtë periudhë si një fazë ku ai po vazhdon më shumë “për inerci” sesa me një energji të re politike apo me një projekt të qartë për të ardhmen.

”Përgëzoj Elisa Spiropalin dhe Marjana Koçekun që kanë reflektuar. Të gjithë duhet të reflektojnë dhe duhet të ecet paralelisht me zemërimin kombëtar. Jemi ende në tranzicion sepse nuk kemi adoptuar ende sistemin demokratik. Na duhet një Shqipëri më e hapur, më e begatë. Ajo që duhet të ndodhë është kushtrimi për të orjentuar saktë kërkesat. Kërkesat duhet të jenë politike, rrëzim i qeverisë dhe qeveri tranzitore apolitike, e drejtuar nga persona jopartiakë. Të hapim një portal online, të gjithë të aplikojnë te portali dhe do të bëhet zgjedhja me juri. Kjo qeveri të ndryshojë Kodin Elektoral. Duhen lista të hapura, që të prodhohen deputetë me principe. Duhet të kemi ndryshime, numërimi të jetë elektronik për shpejtësi dhe për të shmangur deformimet”, tha Meti në ”News 24”.

Bakalli thotë se përveç Koçekut dhe Spiropalit, do të duhej që edhe rreth 16 deputetë të tjerë të pozicionoheshin kundër për të krijuar një shumicë të re apo për të shkaktuar një krizë serioze parlamentare. Sipas kësaj analize, vetëm me disa zëra të izoluar nuk mund të ndryshojë balanca politike në Kuvend, por kërkohet një përçarje më e gjerë brenda grupit parlamentar.

”Kemi ca zëra brenda PS-së, por përveç Koçekut dy të tjerët kanë kohë që flasin. Bushati është shkëputur nga kjo Parti Socialiste, ndërsa Spiropali së fundmi. Na duhen dhe 16 të tjerë deputetë të PS-së që ajo qeveri të bjerë. Kini respekt për veten tuaj dhe shkëputuni nga ai gjiriz”, tha Bakalli.