Dyshimet, sulmi ndaj RENEA-s u porosit nga burgu për një vrasje të ndodhur në 2007-n

Ende nuk është e qartë përse ka ndodhur sulmi ndaj forcave të RENEA-s në Lazarat.

Deri tani ka pasur shumë spekulime, duke nisur që nga fitimi i zgjedhjeve nga e majtë në gjirokastër, deri tek lidhjet me ISIS të të dyshuarve.

Panorama sot shkruan për një tjetër pistë.

Sipas saj, sulmi ndaj RENEA-s ka ndodhur si hakmarrje për vrasjen e Sabri Shurdhit nga ana e forcave të RENEA-s në vitin 2007.

Gazeta shkruan se sulmi mund të jetë organizuar dhe urdhëruar nga vëllai i tij, Florian Shurdhi, që aktualisht ndodhet në burg.

Dhe, për ta argumentuar këtë, gazeta jep edhe disa detaje.

P.sh, për disa orë, grupi i armatosur ka qëlluar në ajër dhe nuk ka goditur asnjë efektiv të forcave policore lokale dhe as mbi FNSH-në, por kanë pritur që aty të shkonte RENEA.

Për më tepër sulmi u krye pranë një memoriali të ngritur në nderim të Shurdhit.

Sabri Shurdhi dyshohej për një vrasje dhe grabitje të armatosur.

Gjatë aksionit për kapjen e tij, Shurdhi qëlloi ndaj forcave RENEA, duke plagosur një prej tyre.

Forcat special iu kundërpërgjigjën dhe e vranë.

Ngjarja në atë kohë shkaktoi trazira të mëdha në Gjirokastër.