E bllokuar prej ditësh nga reshjet e dëborës, hapet rruga në Qafë Thore

Pas një pune intensive që zgjati gjatë gjithë natës, është bërë e mundur hapja e rrugës në Qafë Thore.

Temperaturat e ulëta, që zbritën deri në -10°C, kanë ndihmuar në stabilizimin e dëborës, duke lehtësuar ndërhyrjen e mjeteve borëpastruese.

Autoritetet bëjnë me dije se tashmë është hapur qarkullimi nga Theth në drejtim të Bogë dhe ka nisur lëvizja e automjeteve në këtë segment malor.

Kontraktori i mirëmbajtjes po vijon punën në terren me mjete borëpastruese, duke kryer kriposjen dhe zgjerimin e pjesës kaluese, me synim garantimin e një qarkullimi sa më të sigurt për drejtuesit e mjeteve.

Drejtuesit e automjeteve këshillohen të tregojnë kujdes të shtuar dhe të jenë të pajisur me zinxhirë, për shkak të pranisë së akullit dhe temperaturave të ulëta në zonë.