Ekskluzive, zjarri i përmasave të mëdha rrezikon Borshin (FOTO/VIDEO)

Situata kritike e zjarreve në vend nuk po kursen as Borshin, aty ku flakët e zjarrit po djegin një pjesë të mirë të malit. Në foton ekskluzive të siguruara nga gazeta “Koha Jonë”, vërehet se situata shfaqet kritike, ku zjarri i përmasave të mëdha po djeg qindra hektarë ullishte dhe pemë. Ende në vendngjarje nuk kanë mbërritur forcat zjarrëfikëse, e nëse nuk shkojnë deri në mbrëmje, me shumë mundësi e gjitha maja e malit do të digjet. Më të rrezikuar janë banorët dhe shtëpitë e tyre, të cilat ndodhen pak metra poshtë ku zjarri po djeg gjithçka që gjen përpara. Edhe në këtë rast, fati i tyre është në dorë të vetë zjarrit dhe drejtimit që merr, pasi forcat zjarrëfikësve ende nuk kanë mbërritur aty.