Ekstradimi i “Ballistit”, ministrja serbe: Ja çfarë e pret në Beograd

Shpresa e “Ballist” Morinës, për ti shpëtuar ekstradimit në Serbi, duket se po shuhet nga Gjykata e Lartë e Kroacisë. Kjo e fundit refuzoi apelin e Ismail Morinës, pasi sipas saj kërkesa e tij nuk kishte asnjë bazë ligjore.

Sot ministrja e serbe e Drejtësisë, Nela Kuburoviç, ka folur për çështjen e ekstradimit të Morinës në Beograd. Ajo deklaroi për mediat se gjykatat serbe “mund të sigurojnë gjykim të drejtë dhe të paanshëm” për Ismail Morinën, ekstradimin e të cilit nga Kroacia po e kërkon Serbia.

“Sa i përket kësaj çështje, duhet pritur vendimin e ministrit të Drejtësisë së Kroacisë, por besoj se kolegu do të sillet siç duhet me vendimet e plotfuqishme dhe se Morina do të ekstradohet në Serbi, në mënyrë që të mund të kryhet procedura penale, e cila ka nisur para Gjykatës së lartë në Beograd”, tha Kuburoviç për Tanjug.