Erion Veliaj shkatërron në Rrogozhinë krejt KOALICIONIN e ngritur kundër tij

Aktualitet Kryesore E Hënë, 24 Korrik 2023 09:53

Nga Lindita Kokoli-

Rrogozhina ishte beteja e fundit e Erion Veliajt si drejtues politik i qarkut Tiranë. Kjo bashki ishte dje në rivotime nga KQZ.

Fushata ishte e ashpër kundër Erion Veliajt, nuk ishte kundër kandidatit të PS. U mobilizuan krejt opozita, skalionet brenda mazhorancës që nuk donin Erionin, u futën në lojë gjithfarë mbetjesh që vetëm të humbiste drejtuesi politik.

Emrat dihen, janë shënuar!

Pas mbarimit të numërimit sot doli fitues kandidati i PS Edison Memolla.

Nëse do të humbiste lajmet do të ishin me kryetituj “Humbet Erion Veliaj”.

Pas fitores Erion Veliaj shkruan: “Faleminderit nga zemra qytetarëve të Rrogozhinës, të majtë e të djathtë, që na dhanë një mbështetje përtej pritshmërive tona më optimiste!

Mirënjohje të majtëve, por edhe shumë të djathtëve, që bënë diferencën duke braktisur politikën ‘përça e sundo’ e ‘mish për top’ kundër Perëndimit! Demokratët nuk janë armiqtë tanë, ata nuk janë Saliu, familjet e tyre nuk vrasin e vjedhin, nuk i hapin luftë qytetërimit, nuk jetojnë duke shqyer tjetrin. Demokratët janë vëllezërit tanë dhe kush shkëputet nga Saliu e salinjtë ka kryer një vepër patriotike sot duke votuar majtas! Këtë mesazh e lexuam qartë e do t’ju shërbejmë me përulësi të gjithëve!

Ky është një rezultat i cili i jep përgjigje të gjithëve. Dhe i jep fund përpëlitjeve absurde nga njerëz që duan të përdorin votën për t’u mbrojtur nga zullumet që kanë kryer. Qytetarët e Rrogozhinës nuk e hanë presionin nga askush. As nga xhepat e thellë as nga gojët e thella. Qytetarët e Rrogozhinës duan njerëzit që punojnë, jo ata që përfitojnë. Ky është mesazhi, ky është mandati që na dhanë. Puna! Kësaj do i dalim për zot! Punë të mbarë Edisonit e skuadrës sonë aty!”- përfundon mesazhi i Erion Veliajt.