“Fakte të reja për Bashën”, ja kallëzimi i ri i Ballës në Prokurori (Dokumenti)

Kreu i grupit parlamentar të PS-së Taulant Balla njoftoi ditën e sotme se kishte depozituar në Prokurorinë e Tiranës, fakte të reja për kallëzimin penal ndaj kreut të PD-së Lulzim Basha.

“BalkanWeb” publikon dokumentin e kallëzimit të ri penal që Balla ka depozituar në Prokurori, i cili është plotësim i kallëzimit penal të datës 27 qershor 2018. Sipas Ballës, në kallëzimin e ri, parashtrohen rrethanat dhe faktet e reja.

Balla tha më herët gjatë ditës së sotme se, pret që të zbardhen shpifjet dhe ofendimet e turpshme ndaj tij dhe grupit parlamentar të PS. Ai shprehet se lidhja e PD me pronarët e 3.4 mln eurove është organike ndërsa lidhja e Bashës me ta e afërt sa në foton e publikuar më herët ndaj tij.

“I nderuar z.Prokuror! Më datë 27.06.2018 në ushtrim të të drejtave dhe detyrimeve të mia si deputet në Kuvendin e Shqipërisë, kam paraqitur kallëzim penal në ngarkim të shtetasit Lulzim Xhelal Basha, deputet dhe kryetar i subjektit politik Partia Demokratike e Shqipërisë, për veprën penale të “Zbulimi i akteve ose të dhënave sekrete”, vepër e parashikuar nga neni 295/a i Kodit Penal, duke parashtruar rrethanat e faktet konkrete ku bazohet ky kallëzim”, thuhet në kallëzimin shtesë të dorëzuar në Prokurori nga deputeti socialist Taulant Balla.